Leo XIII Minor Exorcism Prayer - Latin

Pope Leo XIII exorcism prayers which can be used for deliverance praying over people, places or things.

In nómine Patris et Fílii et Spíritus sancti.

R. Amen.

Dóminus vobíscum.

R. Et cum spíritu tuo.

Sancte Creátor Spíritus, adésto propítius Ecclésiæ cathólicæ eámque contra inimicórum incúrsus tua supérna virtúte róbora et confírma, tua caritáte et grátia spíritum famulórum tuórum, quos unxísti, rénova, ut in te claríficent Patrem Filiúmque eius Unigénitum Iesum Christum Dóminum nostrum.

R. Amen.

In nómine Iesu Christi Dei et Dómini nostri, intercedénte immaculáta Vírgine Dei Genetríce María, beáto Michaéle Archángelo, beátis Apóstolis Petro et Paulo et ómnibus Sanctis, et sacra ministérii, ab Ecclésia recépti, auctoritáte confísus, ad infestatiónes diabólicæ fraudis repelléndas secúrus aggrédior.

Exsúrgit Deus et dissipántur inimíci eius et fúgiunt, qui odérunt eum, a fácie eius. Sicut dissipátur fumus, tu díssipas; sicut fluit cera a fácie ignis, sic péreunt peccatóres a fácie Dei.

V. Ecce Crucem Dómini: fúgite, partes advérsæ.

R. Vicit Leo de tribu Iuda, radix David.

V. Fiat misericórdia tua, Dómine, super nos.

R. Quemádmodum sperávimus in te.

V. Dómine, exáudi oratiónem meam.

R. Et clamor meus ad te véniat.

\Orémus.

Deus cæli, Deus terræ, Deus Angelórum, Deus Archangelórum, Deus Patriarchárum, Deus Prophetárum, Deus Apostolórum, Deus Mártyrum, Deus Sacerdótum, Deus Vírginum, Deus Sanctórum ac Sanctárum ómnium, Deus, qui potestátem habes donáre vitam post mortem, requiem post labórem, quia non est Deus præter te, nec esse potest nisi tu, creátor ómnium visibílium et invisibílium, cuius regni non erit finis: humíliter maiestáti glóriæ tuæ supplicámus, ut ab omni inférni spirítuum potestáte, deceptióne et nequítia nos poténter liberáre et incólumes custodíre dignéris. Per Christum Dóminum nostrum.

R. Amen.

Exorcízo te, omnis immúnde spíritus, omnis tenebrárum potéstas, omnis incúrsio infernális adversárii, omnis légio, congregátio et secta diabólica, in nómine et virtúte Dómini nostri Iesu Christi: eradicáre et effugáre a Dei Ecclésia, ab animábus ad imáginem Dei cónditis ac pretióso divíni Agni sánguine redémptis.

Non ultra áudeas, cállide serpens, decípere humánum genus, Dei Ecclésiam pérsequi ac Dei eléctos excútere et cribráre sicut tríticum.

Imperat tibi Deus altíssimus, cui in magna tua supérbia te similem habéri adhuc præsúmis, qui omnes hómines vult salvos fíeri et ad agnitiónem veritátis venire.

Imperat tibi Deus Pater; ímperat tibi Deus Fílius; ímperat tibi Deus Spíritus Sanctus.

Imperat tibi Christus, ætérnum Dei Verbum caro factum, qui pro salúte géneris nostri tua invídia pérditi, humiliávit semetípsum factus obœdiens usque ad mortem; qui Ecclésiam suam ædificávit, supra firmam petram et portas ínferi advérsus eam numquam esse prævalitúras edíxit, cum ea ipse præmansúrus ómnibus diébus usque ad consummatiónem sǽculi.

Imperat tibi sacraméntum + Crucis. omniúmque christiánæ fídei Mysteriórum virtus. Imperat tibi excélsa Dei Génetrix Virgo María, quæ supérbum caput tuum a primo instánti immaculátæ Conceptiónis in sua humilitáte contrívit. Imperat tibi fides sanctórum Apostolórum Petri et Pauli ceterorúmque Apostolórum. Imperat tibi Mártyrum sanguis ac pia Sanctórum et Sanctárum ómnium intercéssio.

Ergo, légio diabólica, adiúro te per Deum vivum, per Deum verum, per Deum sanctum, per Deum, qui sic diléxit mundum, ut Fílium suum Unigénitum daret, ut omnis, qui credit in eum, non péreat, sed hábeat vitam ætérnam: cessa decípere humánas creatúras eisque ætérnae perditiónis venénum propináre; désine Ecclésiæ nocére et eius libertáti láqueos inícere.

Vade, Sátana, mendácii pater, hostis humánæ salútis. Da locum Christo, in quo nihil invenísti de opéribus tuis; da locum Ecclésiæ uni, sanctæ, cathólicæ et Apostólicæ, quam Christus ipse acquisívit sánguine suo. Humiliáre sub poténti manu Dei, contremísce et éffuge per sanctum nomen Iesu, quem ínferi tremunt, cui Virtútes cælórum et Potestátes et Dominatiónes subiéctæ sunt, quem Chérubim et Séraphim indeféssis vócibus laudant, dicéntes: Sanctus, Sanctus, Sanctus Dóminus Deus Sábaoth. Pleni sunt cæli et terra glória tua. Hosánna in excélsis. Benedíctus qui venit in nómine Dómini. Hosánna in excélsis.

Sub tuum præsídium confúgimus, sancta Dei Génetrix; nostras deprecatiónes ne despícias in necessitátibus, sed a perículis cunctis líbera nos semper Virgo gloriósa et benedícta.

Prínceps gloriosíssime cæléstis milítiæ, sancte Míchael Archángele, defénde nos in prœlio advérsus príncipes et potestátes, advérsus mundi rectóres tenebrárum harum, contra spiritália nequítiæ in cæléstibus. Veni in auxílium hóminum, quos Deus ad imáginem similitúdinis suæ fecit et a tyránnide diáboli emit prétio magno.

Te custódem et patrónum sancta venerátur Ecclésia; tibi trádidit Dóminus ánimas redemptórum in supérna felicitáte locándas. Deprecáre Deum pacis, ut cónterat Sátanam sub pédibus nostris, ne ultra váleat captívos tenére hómines et Ecclésiæ nocére.

Offer nostras preces in conspéctu Altíssimi, ut cito antícipent nos misericórdiæ Dómini et apprehéndas dracónem, serpéntem antíquum, qui est diábolus et Sátanas, et ligátum mittas in abýssum, ut non sedúcat ámplius gentes.

R. Amen.