Minor Exorcism From Mechlin Pastorale

Sacerdos indutus ut suprá, dicit:

V. In nómine Patris, + et Filii, + et Spiritus + Sancti.

R. Amen.

Nos cum prole pia benedícat Virgo Maria. Ecce Cru+cem Domini, fúgite partes adversae; vicit leo de tribu Juda, radix David.

V. Dómine exáudi oratiónem meam.

R. Et clamor meus ad te véniat.

V. Dóminus vobiscum.

R. Et cum spiritu tuo.

Orémus.

Deus Angelórum, Deus Archangelórum, Deus Prophetárum, Deus Mártyrum, Deus confessórum, Deus Virginum, Deus et Pater Dómini nostri Jesu Christi, invoco nomen sanctum tuum, ac praeclárae majestátis tuae cleméntiam suppliciter expósco; ut mihi auxílium praestáre dignéris advérsus hunc nequíssimum spiritum, et omnem qui vexat hoc plasma tuum. Per eumdem Christum Dóminum Nostrum.

R. Amen.

Exorcízo te immúnde spiritus, omnis incúrsio adversárii, omnis ira, omne phantásma, omnis légio, in nómine Dómini nostri Jesu Christi eradicáre, et effugáre ab hoc plasmate Dei. Ipse tibi imperat, qui te de supérnis caelórum in inferióra terrae demérgi praecépit. Audi ergo, et nunc sátana victus et prostrátus abscéde, in nómine Dómini nostri Jesu Christi. Tu ergo nequíssime sátana, inimíce fidei, hostis géneris humáni, mortis addúctor, vitae raptor, justitiae declinátor, malórum radix, fomes vitiórum, sedúctor hóminum, próditor géntium, incitátor invídiae, orígo avarítiae, causa discórdiae, excitátor dolórum, malórum magister, quid stas et resistis, cúm scias Deum tuas perdere vires? Illum métue, qui in Isaac est immolátus, in Joseph venumdátus, in agno occísus, in hómine crucifixus, deinde inferni triumphator éxstitit gloriósus. Recéde ergo in nómine Pa+tris, et Fí+lii, et Spiritus + Sancti. Da locum Spiritui sancto, per hoc signum sanctae Crucis, + (híc signet Cruce frontem obsessi) Dómini nostri Jesu Christi: qui cum Patre et Spiritu sancto vivit et regnat Deus, per omnia saecula saeculórum.

R. Amen.

Si nondum recesserit spiritus malignus, Sacerdos prosequitur.

V. Dóminus vobiscum

R. Et cum spiritu tuo.

Orémus.

Deus cónditor et defénsor humáni géneris, qui hóminem ad imáginem tuam formásti: réspice super hunc famulum tuum (vel hanc famulam tuam) N. qui (vel quae) dolis invidi serpentis appétitur, quem (vel quam) vetus adversárius, antíquus hostis terrae, formídinis horróre circúmvolat, et sensum mentis humánae stupóre defigit, terróre contúrbat, et metu trépidi timóris exágitat. Repélle Dómine virtútem diáboli, fallacésque eius insidias ámove: procul impius tentátor aufúgiat. Sit nóminis tui signo Crucis + (in fronte) famulus tuus munítus, (vel famula tua muníta,) et in anima tutus (vel tuta) et córpore.

Híc ter faciet signum Crucis in pectore, dicens:

Tu péctoris huius + intérna custódias. Tu víscera + regas. Tu corda + confirmes. In anima adversatrícis potestátis tentaménta evanéscant. Da Dómine ad hanc incovatiónem sanctissimi Nóminis tui grátiam, ut qui hucúsque terrébat, térritus aufúgiat et victus abscédat, tibíque possit hic fámulus tuus (vel haec fámula tua) et corde et mente praebére famulátum. Per Christum Dóminum nostrum.

R. Amen.

Adjúro te serpens antíque, per Júdicem vivórum et mortuórum, per factórem tuum, per factórem mundi, per eum qui habet potestátem mittendi te in gehénnam; ut ab hoc fámulo (vel hac fámula) Dei N. qui (vel quae) ad Ecclesiae sinum recúrrit, festínus discédas. Adjúro te iterúm, non mea infirmitáte, sed virtúte Spiritus sancti, ut desistas ab hoc fámulo (vel hac fámula) Dei N. quem (vel quam) omnípotens Deus ad imáginem suam fecit. Cede igitur, cede non mihi, sed ministro Christi. Illius enim te urget potestas, qui te, affixus Cruci, subjugávit.  Illius bráchium contremísce, qui devictis gemítibus inférni, animas ad lucem perdúxit. Sit tibi terror corpus hóminis; sit tibi formído imágo Dei. Ne resistas, nec moréris discédere ab hómine, quóniam complácuit Deo in hómine habitáre. Et ne contemnéndum me putes, dum me peccatórem esse cognóscis imperat tibi Deus. + Imperat tibi majestas Christi. + Imperat tibi Deus Pater. + Imperat tibi Deus Filius. + Imperat tibi Deus Spiritus Sanctus. + Imperat tibi fides Apostolórum Petri et Pauli, et ceterórum Sanctórum. + Imperat tibi Mártyrum sánguis. + Imperat tibi Sacraméntum Crucis. + Imperat tibi mysteriórum virtus. + Exi ergo transgréssor, exi sedúctor, plene omni dolo et fallácia, veritátis inimíce, innocéntium persecútor. Da locum duríssime, da locum impiissime, da locum Christo, in quo nihil invenísti de opéribus tuis, qui te spoliávit, qui regnum destrúxit, qui te victum ligávit, et vasa tua dirípuit, qui te projécit in ténebras, ubi tibi cum ministris tuis erit praeparátus intéritus. Sed quid truculénte recógitas? Quid temerárie retráctas? Reus omnipoténti Deo es, cuius statúta transgressus es. Reus es Filio eius Jesu Christo Dómino nostro, quem tentáre ausus es, et crucifigere praesumpsisti. Reus es humáno géneri, cui tuis persuasiónibus mortis fructum propinásti.

Si adhuc non cessaverit aut recesserit, prosequitur Sacerdos.

V. Dóminus vobiscum.

R. Et cum spiritu tuo.

Orémus.

Domine sancte, Pater omnípotens, aetérne Deus: Hosánna in excélsis, Pater Domini nóstri Jesu Christi, qui illum réfugam, tyránnum et apóstatam gehénnae ignibus deputásti, qui Unigénitum tuum in hunc mundum misisti, ut illum rugiéntem contéreret: velóciter atténde, accélera, ut erípias hóminem ad imáginem et similtúdinem tuam creátum, á ruína et daemónio meridiáno. Da Dómine terrórem tuum super béstiam, quae extérminat víneam tuam; da fidúciam servis tuis, contra nequíssimum dracónem pugnáre fortíssimé, ne contemnat sperántes in te, et ne dicat, sicut in Pharaóne iam dixit: Deum non novi, et Israel non dimíttam. Urgeat illum déxtera tua, potens expéllere á famulo tuo (vel famula tua) N. ne diútius captívum praesúmat tenére hóminem, quem tu ad imáginem tuam fácere dignátus es, et in Filio tuo redemísti. Qui tecum vivit et regnat.

R. Amen.

Adjúro ergo te, draco nequissime, in nómine Agni immaculáti, qui ambulávit super áspidem et basilíscum, qui conculcávit leónem et dracónem: ut discédas + ab hómine, discédas ab Ecclésia. + (Hic producit signum Crucis super circumstantes) Contremisce, et effúge invocáto nomine Domini, quem inferi tremunt, cui Virtútes caelórum, Postestátes et Dominatiónes subjéctae sunt, quem Chérubim et Séraphim indeféssis vócibus laudant. Imperat tibi Verbum Caro factum. + Imperat tibi natus ex Virgine. + Imperat tibi Jesus Nazerenus, + qui te, cúm discipulos eius contémneres, elísum atque prostrátum exíre praecépit ab hómine; quo praesente, cúm te ab homínibus separásset, nec porcórum gregem contíngere prasumébas. Recéde ergo nunc adjurátus in nomine eius ab homine quem ipse plasmávit. Durum est tibi velle resistere, durum est tibi contra stímulum calcitráre: qui quantó tárdius exis, tantó magís tibi supplícium crescit: quia non homines contémnis, sed illum, qui ventúrus est judicáre vivos et mórtuos, et saeculum per ignem.

R. Amen.

Si oppressus nondum fuerit liberatus, prosequitur Sacerdos

V. Dominus vobiscum.

R. Et cum spiritu tuo.

Oremus.

Omnipotens Dómine, Verbum Dei Patris, Christe Jesu, Deus et Dóminus universae creatúrae, qui sanctis Apostolis tuis dedísti potestátem calcándi super serpéntes et scorpiónes; qui inter cétera mirabílium tuórum praecépta, dignátus es docére, daemones effugáre; cuius virtúte motus tamquam fulgur de caelo sátanas cécidit: tuum sanctum nomen cum timóre et tremóre supplíciter déprecor, ut indignissimo mihi servo tuo, data vénia omnium delictórum meórum, confidentiam et possibilitátem donáre dignéris, ut hunc crudélem dracónem, bráchii tui sancti munítus poténtia, fiduciáliter et securé aggrédiar: per te Jesu Christe Dómine Deus noster: qui ventúrus es judicáre vivos et mórtuous, et saeculum per ignem.

R. Amen.

Adjúro ergo te omnis immundissime spiritus, omne phantásma, omnis incúrsio sátanae, in nómine Jesu Christi + Nazeréni, qui post lavácrum Jordánis in desertum ductus est, et te in tuis sedibus vinxit, ut quem de limo terrae ad honórem glóriae suae formávit, tu desinas impugnáre; et in hómine miserábili, non humánam fragilitátem, sed imáginem omnipotentis Dei contremíscas. Cede ergo Deo, qui te, humiliáto famulo suo Job, in servitútem redégit. Cede Deo, qui et malítiam tuam in Pharaóne et in eius exércitu per Moysen servum suum in abyssum demérsit. Cede Deo, qui te per Daniélem púerum suum perdidit, et dracónem prostrávit. Cede Deo, qui te per fidelíssimum servum suum David, de rege Saúle spirituálibus canticis pulsum fugávit. Cede Deo, qui te in Juda Iscárioth proditóre damnávit. Ille enim te divínis verbéribus angit, in cuius conspectu cum tuis legiónibus tremens et clamans dixísti: Quid nobis et tibi fili David? venisti ante tempus torquére nos? Ille te perpetuis flammis urgeat, qui in fine temporum dictúrus est impiis: Ite maledíciti in ignem aeternum, quem praeparávit Pater meus diábolo et angelis eius. Tibi enim impie, et angelis tuis vermes erunt, qui numquam moriuntur. Tibi et angelis tuis praeparátur inextinguíbile incendium, quia tu es princeps maledícti homicídii, tu auctor incaestus, tu sacrilegórum caput, tu artium pessimárum magister, tu haereticórum doctor, tu totius obscoenitátis inventor. Exi ergo ímpie, + exi sceleráte + exi cum omni fallácia tua, quia hóminem templum suum voluit esse Deus. Sed quid diútius moráris híc? Da honórem Deo Patri omnipotenti, + cui omne genu flectitur. Da locum Dómino Jesu Christo, + qui pro hómine sanguinem suum sacratissimum fudit. Da locum Spiritu sancto, + qui per beátum Apostolum suum Petrum te manifesté stravit in Simóne mago: qui falláciam tuam in Ananía et Saphíra condemnávit: qui te in Heróde rege honórem Deo non dante percússit: qui te in Elima mago, per Apóstolum suum Paulum caecitatis caligine perdidit: et per eúmdem de Pythoníssa, verbo imperans, exíre praecepit. Discéde ergo nunc, + discéde sedúctor. + Tibi erémus sedes est, tibi habitátio serpens est. Humiliáre et prostérnere, iam non est differéndi tempus. Ecce enim dominátor Dóminus próximat citó, et ignis ardébit ante ipsum, et praecédet, et inflammábit in circúitu inimícos suos. Si enim hóminem fefélleris, Deum non póteris irridére. Ille te éjicit, cuius óculis nihil occúltum est: ille te expéllit, cuius virtúti univérsa subjécta sunt: ille te exclúdit, qui tibi et ángelis tuis praeparávit aeternam gehennam; de cuius ore exiet gládius bis acútus: qui ventúrus est judicáre vivos et mórtuos, et saeculum per ignem.

R. Amen.

Possunt legi Psalmi: Deus in adjutórium. In Dómino confido, et Quid gloriáris in malitia. Item Litaniae cum Precibus suis, et Orationibus.

Taken from Pastorale Rituali Romano (click for link). PP. 275-284